Bilanci “sekret” në Spanjë, mijëra persona kanë vdekur të padiagnostikuar

Me shërbimet funerale të tejmbushura nga kriza e koronavirusit në Spanjë, automjetet ushtarake që transportojnë viktimat nga spitalet e Madridit drejt tre morgjeve të emergjencës nëpër kryeqytet, dy prej të cilëve janë pista patinazhi, por që në këtë periudhë janë përshtatur për të kryer një tjetër funksion, situata në vend paraqitet dramatike.

Sipas ministrisë spanjolle të shëndetësisë, vdekjet nga Covid 19 atje mbërritën të shtunën në 11,744, duke iu afruar Italisë me bilancin më vdekjeprurës prej sëmundjes në botë.

Por autoritetet në qytete të ndryshme e fshatra spanjolle thonë se tabloja e pandemisë është edhe më e zymtë se kaq. Ata shprehen se shifra e jetëve të humbura mund të jetë shumë më e madhe, pasi me mijëra vetë, siç thonë, kanë vdekur të padiagnostikuar.

Megjithate zyrtarët e Ministrisë së Shëndetësisë mendojnë se të paktën ritmi i infektimeve të reja po vjen duke u zbehur. Deri në 25 mars, virusi sipas tyre përhapej me një ritëm ditor prej 20%. Që atëherë niveli ka rënë nën 12%, duke dëshmuar kështu se urdhërat e ndalim-qarkullimit po japin rezultat.