Biletat e transportit publik online, Shoqata e Transportit: I frikësohemi monopolizimit të tregut

Nëse do të shkosh në një qytet tjetër, biletën nuk do t’ja paguash më faturinos në dorë, por përmes aplikacioneve online.

Agjencia Kombëtare e Shoqërisë së Informacionit njofton se shumë shpejt do të vendoset sistemi i biletarisë online për transportin ndërqytetas.

Ky sistem pritet që të formalizojë tregun e transportit dhe të ofrojë një shërbim më të mirë dhe çmim më të përballueshëm për udhëtarët.

Ky projekt vlerësohet nga përfaqësues të Shoqatës së Transportit, por shqetësim mbetet mundësia e kthimit të tregut në monopol.

“Kjo përpjekje e transportit për formalizim tregu duhet edhe që tu japë mundësinë bizneseve private që kanë investuar në fushën e teknologjisë që me anë të sistemeve apo aparaturave të tyre të arrijnë të presin biletën online. Pra duhet të jetë e lirë dhe jo e monopolizuar apo e përqëndruar në një dorë të vetme.”

Por a është e mundur që ky shërbim të ofrohet në Shqipëri, pasi sipas Shoqatës së Transportit ende nuk është e rregulluar infrastruktura në terminale apo vendqëndrime.

“Duhet patjetër të kemi investime në infrastrukturën e transportit rrugor të udhëtarëve. Kushtet në terminale janë zero, duhet patjetër të ketë investime. Edhe në stacionet e qëndrimit në mënyrë që të ketë akses nga ana e udhëtarëve në rrugë nacionale dhe zona rurale që nuk kanë shërbim.”

Ende nuk është e qartë nëse do të ketë vetëm një aplikacion online apo çdo shoqëri do të ketë aplikacionin e vet.