”Bomba” e John Bolton për kufijtë, Islami: Kurti ka qenë pengesë për këtë skenar

Ish-këshilltari për Sigurinë Kombëtare në Shtëpinëe Bardhë, John Bolton, ka trazuar ujërat me deklaratat e tij mbi një marrëveshje midis Presidentit të Kosovës, Hashim Thaçi dhe atij të serbisë, Aleksandër Vuçiç për shkëmbimin e territoreve në kuadër të marrëveshjes Serbi-Kosovë.

Për ish-ministrin e Jashtëm, Kastriot Islami, Bolton nuk i ka hedhur benzinës flakë, por i ka hedhur një ndriçim një çështjeje që diskutohej prej kohësh”. Islami thotë se ka qenë gjithmonë i sigurt për dështimin e marrëveshjes, për dy arsye kryesore.

“Kam patur gjithmonë bindjen që kjo marrëveshje do të bllokohej, kryesisht dhe ekzaktësisht nga Gjermania, qe nuk ka ceduar kurrë nga pozicioni i saj kundër. Për Berlinin në qofte se fillon në Ballkan shkëmbimi i territoreve, hapet kutia e Pandorës që nuk dihet ku të çon, sigurisht në destabilitetin e rajonit. Kjo është çështje midis Thaçit dhe Vuçiç që nis nga ky i fundit dhe që ka si skenar idenë e Serbisë së madhe që do të garantonte pushtetin e tij”.

Sipas tij, ish-kryeministri Albin Kurti ka qenë pengesë për këtë skenar dhe për këtë arsye ”faktorë të rëndësishëm që merreshin me këtë çështje e kanë larguar”, sepse nuk pranonte skenarin e gatuar prej kohësh. Diskutimet sipas tij kulmuan në Nish, aty ku tre liderët, Vuçiç, Thaçi dhe Rama u takuan në kuadër të Minishengenit ballkanik, që sipas tij ”paraqet të njëjtin skenar të prezantuar në mënyrë të ndryshme”.