Borë deri në 1.6 metra, temperatura nën zero dhe pa drita/ Izolohen fshatrat e Kelmendit në Shkodër

Reshjet e dëborës kanë izoluar fshatrat e njësisë administrative Kelmend në Shkodër.

Fshatrat Vermosh, Lëpushë, Gropat e Selcës prej 24 orësh nuk kanë komunikim me pjesën tjetër të vendit.

Aktualisht në Lëpushë trashësia e dëborës i kalon 160 cm, në Qafë të Predelecit 210 cm dhe në Vermosh 75 cm.

Ndërkohë që ditën e sotme temperaturat kanë zbritur deri -10 gradë celcius.

Aksi rrugor shkallë Gropa drejt Vermoshit ndodhet i bllokuar dhe si pasojë e dëborës, ngricave dhe akullit asnjë automjet nuk mund të ngjitet.

Banorët e këtyre fshatrave kanë 5 ditë pa energji elektrike.

Në Vermosh mësohet se është bllokuar dhe segmenti rrugor që lidh këtë fshat me pikën doganore të Gerçarit.