Cefa: Rinumërimi i votave të Beratit mund të ndryshojë strategjitë e partive në KAS

Anëtari i Komisionit të Ankimimit dhe Sanksioneve në KQZ, Elvis Cefa, thotë se procesi i rinumërimit të votave të qarkut të Beratit po shkon mirë, sipas objektivit kryesor të KAS-it për të garantuar transparencën.

Për më tepër ai nënvizon se prej rinumërimit të 114 kutive nga 277 që ka qarku i Beratit, do të shihet nëse do të ndryshojë rezultati dhe më pas nga partitë mund të kërkohet ose jo shqyrtimi edhe i pjesës tjetër.

“Janë përfunduar plotësisht së rinumëruari 46 nga 114 kuti që kemi urdhëruar të hapen, synojmë që kjo pjesë e kutive që u vendos të hapeshin dje [e enjte] të përfundojnë brenda ditës së sotme, më pas do të shohim nëse rezultati i rinumërimit të këtyre kutive do të ketë ndikim në rezultatin përfundimtar të votimit në qarkun e Beratit”,-tha përfaqësuesi i PD-së në KAS, Elvis Cefa. KAS e miratoi unanimisht kërkesën e Lëvizjes Socialiste për Integrim për të hapur kutitë.