Covid-19, Brataj: Do t’i kthehemi jetës normale, informimi nga kushdo ul besimin te qytetarët

I ftuar në Ora News, drejtori i Urgjencës Kombëtare Skënder Brataj u shpreh besimplotë se Shqipëria dhe bota shumë shpejt do t’i kthehen jetës normale.

Sipas tij, shkenca ecën përpara, ndërsa shtoi se vaksina kundër Covid-19 do të japë efektet e saj.

“Sigurisht që do ti kthehemi jetës normale. Bota me pandemitë edhe kur nuk ka patur vaksina i është rikthyer jetës normale. Tani, për fatin e mirë, shkenca ka ecur përpara. Për fatin e mirë, po të shikojmë të dhënat, janë 88 milionë të infektuar, ndërsa po të kthehemi para një shekulli ishin 50-100 milionë të vdekur dhe nuk mori këto përmasa botërore që mori Sars Cov-2.

Shkenca ecën përpara, trajtimi është përmirësuar, vaksinat kanë mbi 100 vjet që kanë filluar të aplikohen. Bota shkencore dhe bota e pasur duke parë që nuk ngeli njeri pa u prekur u lëshuan drejt vaksinës, drejt kërkimit shkencor dhe e realizuan atë.

Kemi folur edhe herë të tjera këtu dhe unë personalisht jam shprehur se brenda vitit do të vinte vaksina. Dhe për fatin e mirë erdhi. Eksperienca në 20-30 vitet e fundit me Sars dhe Mers përshpejtoi punën për vaksinën e re që doli, për Sars Cov-2“, u shpreh kreu i Urgjencës Kombëtare.

Sa i përket informacionit mbi situatën e pandemisë, Brataj u shpreh se dhënia e tij nga shumë njerëz ka ulur besimin e qytetarëve të bluzat e bardha.

“Njerëzit me të drejtë duan informacion. Qytetarët kanë të drejtën e informimit por për fatin e keq informimin e japin shumë njerëz dhe gjithësecili ka një qëllim kur jep një informacion. Individuale, politike, ekonomike, relogjoze… Janë të gjitha që ndërthuren“, tha Brataj.