Covid-19 në shkolla, Kule: Tetë fëmijë të shtruar me komplikacione

Gjeorgjina Kule, mjeke pediatre ka folur rreth fëmijëve të infektuar me Covid-19, numri i të cilëve ngelet i pandryshuar nga ai i para fillimit të vitit të ri shkollor. Kule tha se duhet pritur edhe pak për të vlerësuar situatën duke qenë se periudha e inkubacionit shkon deri në dy javë. Ajo nënvizoi gjithashtu faktin se janë të përgatitur për një shtim të numrit të rasteve.

”Shifra të sakta në lidhje me fëmijët e infektuar në shkollë duhet t’i merrnim nga Instituti i Shëndetit Publik por gjatë këtyre ditëve hospitalizimet e rasteve të fëmijëve që kanë qenë me infeksion nga SARS COV-2 kanë qenë fëmijë të moshës së vogël para moshës shkollore”, sqaroi mjekja.

Më tej pediatria tregoi se aktualisht janë tetë fëmijë të shtruar të infektuar me Covid-19 që kanë komplikacione, por situata shton ajo është nën kontroll. Kule nuk e mohon që ekziston si mundësi agravimi i situatës dhe si për rrjedhojë mësimi duhet të zhvillohet në kushte të tjera por konkretisht numri i rasteve nuk e bën të nevojshëm një formë alternative të mësidhënies.