Covid-19 prek “skifterat”, në 12 ditë asnjë vjedhje

Karantina nuk ka prekur vetëm përditshmërinë e qytetarëve në Tiranë por edhe atë të “skifterëve”. Hajdutët kanë ngelur pa punë dhe shkak është bërë prania në banesa pothuajse 24 orë e qytetarëve në Tiranë. Kryeqyteti, vjedhjet e banesave dhe automjeteve i ka patur tradicionalisht gangrenë gjatë viteve të fundit, ku në gjithë Tiranën regjistrohen zakonisht dhjetëra syresh në ditë. Për këtë situatë është bërë edhe patrullimi i dendur i forcave të policisë dhe ushtrisë gjatë ditëve të fundit. Kontrollet për shkelësit e ndalim qarkullimit kanë bërë që edhe skifterët të hyjnë nëpër strofullat e tyre në pritje të ditëve më të mira për aktivitetin e tyre kriminal. Në vitin që lamë pas, Tirana do të regjistronte gjithsej 1.807 vjedhje e grabitje. Numrin më të lartë të tyre do e mbanin ato në banesa, me 274 raste të tilla.