Dalin detaje/ Kush është biznesmeni me miliona lekë në makinë, do i çonte në bankë. Grabitësit e ndoqën

Hetimet paraprake kanë zbuluar të tjera detaje nga ngjarje që bën fjalë për grabitjen e më shumë se 250 milionë lekëve, të cilat ishin në bagazhin e makinës së një biznesmeni.

Ky i fundit kishte marrë sasinë e parave për ta depozituar në një filial banke të nivelit të dytë që ndodhej brenda ambienteve të Qendrës Kristal në Tiranë. Hajdutët kishin më parë informacion dhe i janë vënë pas, duke e realizuar grabitjen, por pa mundur ta shijojnë, sepse u zbuluan nga Policia.

Sipas hetuesve, biznesmeni ka lënë paratë në garazh për të parë nëse kishte apo jo radhë në sportelet e bankës, apo nëse ajo ishte e hapur në atë orë nisur nga kufizimet që vijnë pë shkak të orarit të pandemisë Covid 19.

Me datë 22 maj në Komunën e Parisit dy persona, D. H. 27 vjeç dhe G. K. 44 vjeç, i grabitën 200 milionë lekë dhe 50 mijë franga shtetasit F. B., pronar i shumë fabrikave dhe bizneseve, ndër të tjera edhe i një fabrike cigaresh.

Më saktësisht ai merret me import, eksport, tregtim cigaresh dhe artikujsh të ndryshme. F. B. rezulton edhe pronar i kompanive të ndërtimit, që mund të përfitoj fonde publike dhe jo publike të objekteve shumë të rëndësishme si rrugëve, urave, tuneleve e veprave të artit.

Burime të ndryshme kryesisht mediatike bëjnë të ditur se biznesmeni është person me precedentë të mëparshëm penalë, por pa specifikuar përse bëhet fjalë.