Denaj: Mbështetja gjermane e rëndësishme në ekonomi

Ambasada Gjermane në Tiranë organizoi aktivitetin me rastin e ”Tetorit gjerman”, ku pjesëmarrëse ishte edhe Ministrja e Financave, Anila Denaj për të prezantuar punën e GIZ në Shqipëri, tema e të cilit është ”Talente dhe ide për të ardhmen e Shqipërisë”. Denaj vlerësoi bashkëpunimin mes Shqipërisë dhe Gjermanisë dhe shprehu mirënjohjen e saj për mbështetjen që qeveria Gjermane i ka dhënë dhe i jep vendit tonë.

Sipas saj, ky bashkëpunim është mbështetur në dy shtylla komplementare, bashkëpunimin financiar dhe bashkëpunimin teknik, ku mbështetja është dhënë në projekte të ndryshme në fushën e energjetikës, infrastrukturën sociale, por edhe në fusha të tjera të ekonomisë, si bujqësia apo turizmit.

Ministrja Denaj informoi se MFE është duke punuar mbi një strategji, e cila do të fokusohet në një përshtatje më të madhe të punësimit me arsimin profesinal, si dhe për një qasje tjetër në dëgjimin e zërit të biznesit lidhur me arsimin profesional. ”Investimi në shkollat profesionale është i larmishëm dhe ka nisur prej kohësh. Për katër vitet e fundit shohim një rritje të nxënësve në shkollat e arsimit profesional. Në këtë aspekt kemi punë për të bërë, si në aspekt të kurikulave, për të përmirësuar cilësinë e tyre dhe gjetjen e atyre cilësive profesionale që i vlejnë tregut të punës, por edhe infrastrukturës, në mënyrë që shkollat të jenë të përshtatshme dhe për arsimin dual”.