Denaj takim me ambasadoren Zach: Austria, asistencë për sigurinë ushqimore

Ministrja e Bujqësisë dhe Zhvillimit Rural, Anila Denaj priti në një takim ambasadoren e Austrisë në vendin tonë, Monica Zach. Denaj bëri të ditur se gjatë takimit u diskutua për forcimin e mëtejshëm të marrëdhënieve dypalëshe dhe mundësitë e reja për bashkëpunim në sektorin e bujqësisë dhe zhvillimit rural. ”Asistenca teknike që pritet të marrim nga Austria në fushën e sigurisë ushqimore dhe rehabilitimin e infrastrukturës së ujitjes dhe kanaleve irriguese, do të kontribuojë në procesin e integrimit në BE”, deklaroi ministrja. Denaj vuri në dukje se gjatë takimit u diskutua edhe ecuria e marrëveshjes UBT-BOKU, e cila sipas saj, do të transformojë UBT në një qendër me influencë rajonale.