Denaj: Zbatimi i reformave strukturore ka rritur aftësitë konkurruese në vend
Shqipëria në dekadat e fundit është transformuar ekonomikisht, duke i hapur rrugën një tregu me potenciale dhe mundësi jo vetëm në terma të burimeve natyrore por edhe të kapitalit njerëzor. Ministrja e Financave dhe Ekonomisë, Anila Denaj, e cila mori pjesë në konferencën e organizuar nga Banka e Shqipërisë mbi të ardhmen e banking-ut vlerësoi se rritja ekonomike e qëndrueshme dhe konsolidimi i kuadrit makro-fiskal në vitet e fundit i kanë shërbyer uljes së papunësisë dhe përthithjes së investitorëve të huaj.
Megjithatë, ministrja vuri theksin në disa elementë të rëndësishëm në sigurimin e një rritje ekonomike të qëndrueshme në afatmesëm, si fokusimi në sektorë me potenciale për zhvillimin ekonomik, si turizmi apo bujqësia, rritjen e konkurrueshmërisë së biznesit të mesëm, aksesin në finance, si dhe formalizimin e ekonomisë. “Duhet të kemi fokus në strukturën e ndikimit në rritjen ekonomike dhe mbi të gjitha në potencialet ekonomike që ka vendi ynë në disa sektorë, siç është ai i bujqësisë apo turizmit dhe, në këtë aspekt, kuptohet që zhvillimet infrastrukturore janë të rëndësishme, po jo vetëm. Rritja e konkurrueshmërisë së biznesit të mesëm në Shqipëri, formalizimi i ekonomisë dhe aksesi në finance vijnë si elementë të domosdoshëm për t’a bërë këtë rritje të qëndrueshme në terma afatmesëm”, u shpreh Denaj.
Perspektiva ekonomike në terma afatmesëm, tha ajo, mbetet pozitive, me një nivel mesatar inflacioni në nivelet e 2% dhe me një politikë monetare stimuluese. Gjithashtu, Denaj vlerësoi edhe zhvillimet në sektorin bankar, i cili sot është i mirë kapitalizuar dhe fitimprurës, duke shërbyer si një katalizator në rritje për kreditimin e sektorit privat, ndërsa niveli i kredive të këqija ka zbritur në nivelet e 11.2%. Ministrja Denaj shprehu angazhimin për të vijuar reformat dhe përmirësimin e kuadrit ligjor dhe institucional në sektorë të ndryshëm, në mënyrë që të mundësohet një rritje ekonomike e qëndrueshme, në nivelin prej 3-4%.
“Zbatimi i reformave të administrimit fiskal si pjesë e reformave më të gjëra strukturore do të ndihmojë rritjen e aftësisë konkurruese, rritjen e produktivitetit dhe nxitjen e inovacionit duke siguruar kushte të barabarta konkurrence ndërmjet lojtarëve në treg”, u shpreh Denaj. Ministrja përmendi disa nga ndryshimet ligjore kryesore që janë ndërmarrë së fundmi, si ligji i Unifikuar i Investimeve në bashkëpunim me IFC, projektligji Për Faturën dhe Sistemin e Monitorimit të Qarkullimit”, ndërsa në bashkëpunim me Bankën e Shqipërisë synohet përmirësimi i kuadrit ligjor financiar për Sistemet e Pagesave apo për Sipërmarrjet e Investimeve Kolektive. Denaj tha më tej tha se vetëm përmes reformave të integruara me të gjithë aktorët mund të shkohet përpara drejt një rritje ekonomike të qëndrueshme dhe afatgjatë.
