Denoncimi i PD: Jo vetëm nuk i ndihmon për dëmet nga tërmeti, por qeveria i gjobit kur riparojnë

Përfaqësuesi i Partisë Demokratike, Luan Baçi ka zhvilluar sot një takim me disa banorë në fshatin Shetaj të Ishmit, banesat e të cilëve janë prekur nga tërmeti. Gjatë bashkëbisedimit me demokratin, banorët janë ankuar për faktin se janë gjobitur nga INUK i Durrësit pasi kanë bërë punime për rindërtimin e shtëpive.

Një prej banorëve, Ismet Shetaj denoncoi inspektorin e INUK-ut të Durrësit, Ardit Halili, që sipas tij e gjobiti me 5 milionë lekë pas punimeve për rindërtimin e shtëpisë së dëmtuar nga tërmeti. “Shtëpinë po e rregulloj me të ardhurat e mia. Askush s’më ka ndihmuar. Po punoj me fjalën e Edi Ramës se kush ka lek ta ndërtojë vetë shtëpinë. Tani po na vë gjoba.”- tha banori i Ishmit.

Ndërkohë, Zejdi Kaculi nga fshati Ishëm i tha ish deputetit Luan Baçi se shtëpia e tij ishte vlerësuar 3 herë që pas 21 shtatorit. “Në tërmetin e parë inxhinierët thanë se është i pabanueshëm. Në tërmetin e dytë thanë është e pabanueshme. Kur erdhën një grup tjetër na thanë: Kjo është vetëm për çati. U thashë “banoni ju këtu se e rregulloj unë çatinë. Kjo nuk është e banueshme. Këtu jetojnë njerëz, jo gjëja e gjallë”,- u shpreh ai i revoltuar.