Deputetët e PD: Romët kërkojnë ndihmë, reshjet u kanë shkatërruar gjithçka

Gjendja pas reshjeve të fundit në vendin tonë, ka shkaktuar mjaft bëme materiale. Komuniteti rom, është ai që preket i pari nga këto fatkeqësitë natyrore, për faktin se shtëpitë e tyre janë të ngritura në forma çadrash dhe lehtësisht mund të preken kur lumi del nga shtrati. Në ndihmë të këtyre familjeve, Deputetët e Partisë Demokratike, Myqerem Tafaj dhe Jorida Tabaku vizituan në ditën e sotme, familjet pranë bregut të Lumit në Njësinë nr 4.

Deputetët apeluan për ndihmë ndaj këtyre banorëve, pasi kanë humbur shumë nga vërshimi i ujit, jetojnë në kushte të vështira ekonomike, pa energji, pa ushqime dhe në nevojë urgjente për strehim.

“Këto familje jetojnë në kushte të vështira të strehimit dhe shkurtimi i fondeve për strehimin është një goditje e madhe për to. Kërkohet një ndërhyrje emergjente e qeverisë për të mbështetur këto familje por edhe për zhdëmtim për dëmet e përmbytjes së dy ditëve me parë. Janë pa drita”, është shprehur deputeti Tafaj.

Në kushtet e një papunësie të thellë, komuniteti i banorëve ka kërkuar ndërhyrje nga qeveria, për normalizimin e jetës së tyre, ndërsa kanë denoncuar dhe strukturat e OSHEE-së që në këto kushte u kanë ndërprerë energjinë e madje shumë prej tyre kanë përfunduar në qeli.

R.Shtylla