Deputeti demokrat Baçi: Jo arnime të kodit zgjedhor, PS nuk do Reformë

Deputeti i PD-së, Luan Baçi thotë se Reforma Zgjedhore duhet të jetë gjithëpërfshirëse dhe të trajtojë qartë të gjitha problematikat e sistemit zgjedhor. Për të mazhoranca socialiste në Komisionin e Reformës Zgjedhore, bashkë më përfaqësues të PD zyrtare, po ‘u hedhin hi syve’ shqiptarëve sikur po punojnë për të bërë Reformë Zgjedhore, por në fund sipas tij, do të bëjnë atë që duan ata.

“Nëse u la në dorë të partisë për ta bërë rreshtimin, atëherë lista mbetet e mbyllur, për arsye se e ke orientuar se kush duhet të votohet më shumë, ndërsa po u bë sipas alfabetit, atëherë mund të quhet listë e hapur. Duhet parë si do votohet, ku do votohet, kush do e kontrollojë votën, etj.

Prandaj duhet të mblidhet Komisioni i Reformës Zgjedhore. Merret eksperiencë nga ndërkombëtarët, për të pasur një kod zgjedhor sa më të drejtë, për zgjedhjet e ardhshme. Këto janë pretendimet që PD bën.

Jo të bëjnë dy arnime të Kodit Zgjedhor për të thënë që bëmë reformë. I kanë bërë gati ca gjëra vetë aty dhe në fund fare do të bëjnë atë që duan ata. Nuk dua të merrem më fare me këta kolegët tanë të dalë nga lista e 2021. Nëse do të ishin të sinqertë, ata nuk do të thoshin që nuk i njohim këta deputetët e tjerë. E kanë përjashtuar edhe Bardhin, ne na kanë përjashtuar më herët akoma”, tha Baçi në ”Euronews Albania”