Deputeti ironizon Ballukun: Shqiptarët të mbulohen me batanije, ju bëni propagandë
Thirrja nga ministrja e Energjitikës, Belinda Balluku drejtuar qytetarëve për të kursyer energji, është ironizuar nga deputeti i PD-së, Dashnor Sula. Në facebook Sula shkruan se edhe në zyrën e ministres duken dritat dekorative të cilat janë vendosur prej më shumë se një jave dhe harxhojnë energjinë që kursejnë qytetarët. ”Qeveria nuk e ka problem nëse qytetarët sëmuren në këto temperatura të ulëta, por mjafton që të ketë energji për të ndriçuar rrugët dhe sheshet e qyteteve për të realizuar propagandën. Ta shesim Shqipërinë si një vend festiv me njerëz të gëzuar, ndonëse qytetarët shkojnë në shtëpi dhe mbulohen me batanije”,-shkruan deputeti.
Postimi i plotë
Kjo qeveri përpiqet çdo ditë që ti ofendojë e ti poshtërojë qytetarët e sajë. E bëri edhe sot. Me moton “bëj si them unë e mos bëj si bëj unë”, ministrja e qeverisë, ditën që shiti 4.5 milionë euro energji u shtir sikur i bëri një të mirë shqiptarëve se nuk do rrisë energjinë.
Ndërkohë që sot ministrja përgjegjëse përsëriti apelin për të kursyer energji elektrike. Do të ishte apel i mirëpritur nga cilado qeveri për të kursyer, por më së pari shembulli do duhej të jepej nga vet ata që apelojnë. A ndodh kjo në Shqipëri?
Në një kohë që Ministrja e Energjisë përsërit apelit që qytetarët edhe në këto temperatura të ulëta të kursejnë energji, vet institucionet shtetërore, qendrat e qyteteve nuk kanë më dallim nëse është ditë apo natë. Edhe kur dielli perëndon janë miliona llampa dekorative që ndriçojnë. Madje edhe në zyrën e ministres që bëri këtë apel, duken dritat dekorative të cilat janë vendosur prej një jave tashmë dhe ditë e natë harxhojnë atë që kursejnë qytetarët.
Përfundimi, sigurisht që sërish qytetarët e paguajnë. Qeveria nuk e ka problem nëse qytetarët sëmuren në këto temperatura të ulëta, por mjafton që të ketë energji për të ndriçuar rrugët dhe sheshet e qyteteve për të realizuar propagandën. Ta shesim Shqipërinë si një vend festiv me njerëz të gëzuar, ndonëse qytetarët shkojnë në shtëpi dhe mbulohen me batanije.
