Deputetja e LSI-së: Kupa është mbushur dhe protesta e nesërme është luftë për shpresë

Nesër në orën 11:00 opozita e bashkuar do të protestojë përballë Kryeministrisë me qëllim largimin e Edi Ramës nga pushteti.

Për të folur mbi atë se cfarë mund të ndodhë nesër, në studion e emisionit ‘Repolitix’ ishin të ftuar Fatos Klosi, Ilir Kalemaj, Aleksandër Çipa dhe deputetja e LSI-së, Nora Malaj.

Deputetja e LSI-së, Nora Malaj thotë se kupa është mbushur dhe protesta e ditës së nesërme është luftë për shpresë, pasi gjendja është mjaft e keqe në të gjitha aspektet dhe të rinjtë po largohen nga vendi.

“Nesër do të ketë revoltë popullore, por revoltë nuk do të thotë të marrësh armët. Edi Ramën e kam shokun tim të fëmijërisë, i them se si kryeministër nuk vlen, si shok je shumë i mirë. Ramës nesër i uroj mbledhje të qetë në Vlorë, ta shijojë Vlorën, pasi historikisht të gjithë pushtetarët i bëjnë pushimet në Vlorë dhe si këshillë është që ta shikojë protestën me mend në kokë dhe të bëjë vlerësimin e drejtë” tha ajo.

Gazetari Aleksandër Çipa shprehet se: “Të dyja palët po sabotojnë procesin zgjedhor. Jemi në momentin ku duhet të shpalosen me qindra projekte për pushtetin vendor. Ky parlament është maskaradë, turp i historisë së Shqipërisë”, deklaroi ai.