Dështimi me negociatat, “raundi i dytë” në dhjetor?

Nuk ka ”PO” për çeljen e negociatave të anëtarësimit me Shqipërinë dhe Maqedoninë e Veriut. Kompromisi mes liderëve të BE-së dhe krerëve të shteteve anëtare nuk ishte i mundur për shkak të Francës.

Presidenti i Francës, Emmanuel Macron kërkoi që procesi i zgjerimit të stopohet pa afat deri në reformimin e thellë të tij. Përveç Francës, edhe Holanda ishte kundër çeljes së negociatave me Shqipërinë. Për Maqedoninë e Veriut, kryeministri Mark Rut kishte një tjetër qasje dhe kërkoi të veçohej në procesin e integrimit. Kjo kërkesë e tij u kundërshtua nga liderët dhe shtetet e tjera anëtare të BE-së.

”Politico.eu”, thotë se bisedimet janë ndërprerë por Presidenti i Këshillit Europian Donald Tusk pritet që të njoftojë se do të ketë një takim të dytë në dhjetor, ku liderët do t’i rikthehen çështjes së zgjerimit. Edhe pasuesi i tij në këtë detyrë, Charles Michel, citohet të ketë thënë se ”është i gatshëm të merret me këtë çështje”, në dhjetor, sipas një burimi diplomatik.