Dita e parë e mbylljes së 215 gjimnazeve, mësimi kalon online

Pasi Komiteti Teknik i Ekspertëve mori disa masa, duke nisur nga kjo e enjte e për 2 javët në vazhdim, shkollat e mesme në 10 qytete të vendit që kanë një numër të lartë të prekjeve nga Covid-19, do të qëndrojnë të mbyllura.

”Shkollat e mesme në Tiranë, Fier, Vlorë, Berat, Durrës, Gjirokastër, Lezhë, Lushnje, Pogradec dhe Kamzë kalojnë online. Kemi 215 gjimnaze publike dhe jopublike me rreth 48 mijë nxënës, pothuajse 50% e nxënësve të arsimit të mesëm”, thotë Fiqiri Çifligu, përgjegjës sektori në Drejtorinë e Arsimit Parauniversitar.

Mësimi do të vijojë përmes platformave online. “Përmes Akademi.al apo platformave të tjera funksionale. Do të jetë edhe kanali Youtube i MSR dhe RTSH shkolla ku janë regjistruar video njëkohësisht me programin që duhet të zbatonte shkolla në mjedise fizike”.