Doganat Shqiptare bashkëpunim me UNODC për gjurmimin e kontenjerëve
Aktualitet E Premte, 18 Dhjetor 2020 15:17
Drejtori i Përgjithshëm i Doganave, Genti Gazheli, priti në një takim Drejtoren e Zyrës së UNODC, në Shqipëri, Ela Banaj, dhe Ekspertin e UNODC, në Organizatën Botërore të Doganave(WCO), Svetlan Savov.
Gjatë këtij takimi biseda u përqëndrua në zbatimin e Programit të Kontrollit të Kontenjerëve në Portin e Durrësit, ku UNODC ka prokuruar njëzet gjurmues kontenjerësh, GPS, të cilët do të vihen në dispozicion për nevojat e Njësisë së Kontrollit të Kontenjerëve dhe të Drejtorisë së Përgjithshme të Doganave.
Gjithashtu do të ofrohet trajnim i punonjësve për përdorimin e tyre. Eksperti i WCO, do të zhvillojë një trajnim tre ditor mbi Opioidet dhe Prekursorët e Drogave, ku do të marrin pjesë punonjësit e Njësisë së Kontrollit të Kontenjerëve në Portin e Durrësit dhe të Njësisë së Kontrollit të Kargove Ajrore, me qëllim shkëmbimin e eksperiencave mbi indikatorët e riskut, tendencat e trafikimit/kontrabandimit dhe analizën e informacionit.
