Doshi:”Meta kapo i një bande kriminale që ble vota”

Nuk ndalon deputeti shkodran Doshi duke sulmuar Ilir Meten. Ai ka marrë pjesë sërish në një takim të kandidatit të së majtës për Bashkinë e Vaut të Dejës, në fshatin Hajmel. Ai u ka kërkuar banorëve votën për kandidatin e majtë. Doshi nuk i ka kursyer akuzat ndaj kandidatit të djathtë, për të cilin tha se në zgjedhjet e fundit, i shiti 1280 vota LSI-së.

“Edhe kësaj radhe nuk e kanë mbështetur deputetët e Shkodrës. Deputetët e Shkodrës kanë mbështetur Pjetër Lleshin. Ndërhyrja e Ilir Metës, pazaret që u bënë dhe erdhi prapë e kandidoi. Mua mu bë qejfi se pashë disa kanale që po punonin se ndërmarrjen e ujërave e ka LSI-ja. Shumë mirë po bëjnë që po punojnë se është në të mirën tuaj por vota s’ka në këtë zonë. Të gjithë të djathtët nuk kanë pse me votu LSI-në”, – ka thënë Doshi.

Doshi gjithashtu ka akuzuar kreun e Kuvendit Ilir Metën, të cilin e ka quajtur kryetar të një bande kriminale, se ka bllokuar të gjitha institucionet. Doshi tha se askush nuk mund ta largojë nga politika, përveç popullit.

“Është turpi më i madh të votosh Ilir Metën. Ilir Meta nuk është kryetar i Kuvendit por është kryetari i një bande kriminale që i ka bllokuar të gjitha institucionet, qeverinë, parlamentin, prokurorinë, gjykatat. Të gjithë tenderët që zhvillohen thonë këtu ka hyrë Iliri, këtu e ka Iliri. Iliri ka marrë të gjitha bashkitë që kanë më vlerë të madhe nëntokësore: Bashkinë e Bulqizës, bashkinë e Kukësit, që është kromi. Ka marrë Bashkinë Lezhë, do bregdetin, Pogradecin, e me radhë e me radhë. Deshi me marrë edhe Shkodrën. Mendoi se po më përjashton mua prej politikës. Ata nuk kanë shans të më përjashtojnë mua prej politikës. Prej politikës më përjashtoni vetëm ju”, u është drejtuar Doshi banorëve të Hajmelit.

Komuna Hajmel, bashkë me 5 komuna të tjera do të jetë pjesë e Bashkisë së Vaut të Dejës pas zgjedhjeve të 21 qershorit.