Dosja “Frroku”, Didi përballet me Bajraktarin për shkresën nga Belgjika

Hetimet ndaj deputetit Mark Frroku vijojnë pas akuzave që vijnë nga Belgjika teksa sot ish –Drejtori i Përgjithshëm i Policisë së Shtetit Artan Didi është përballur në prokurori me ish –shefin e Interpol Tiranës, Artan Bajraktarin. Ata janë ballafaquar në lidhje me shkresën e dërguar nga autoritetet belge për arrestimin e deputetit Mark Frroku. Dyshohet se kjo shkresë e mbërritur në muajin janar u mbajt e fshehtë nga policia për afro 3 muaj, çka solli edhe largimin e Didit nga detyra. Didia dha dorëheqje, ndërsa Bajraktari u arrestua nga SHKB dhe u lirua dy ditë më pas nga gjykata. Përpara prokurores Sonila Muhametaj, ish-kryepolici Didi ka mohuar të jetë vënë në dijeni nga Bajraktari. Ndërsa ish –shefi i Interpol Tirana ka deklaruar se ka zbatuar ligjin duke ia përcjellë kërkesën eprorit të tij në atë kohë.