Dosjet e OFL për “të fortët” me mangësi, SPAK i kthen

Edhe pse Operacioni Forca e Ligjit, publikon çdo ditë emrat e “të fortëve” në lidhje me deklarimin e pasurisë, duket se dosjet kanë probleme. Struktura e Posaçme kundër Korrupsionit dhe Krimit të Organizuar ose SPAK, i ka kthyer policisë për plotësim me dokumente dy dosjet e para të operacionit “Anti-KÇK”, ndërkohë që numri i procedimeve në verifikim ka shkuar në 15-të.

Policia e Shtetit u ka nisur formularin për deklarimin e burimit të pasurisë të dënuarit Pajtim Serjani, i dënuar për gjobëvënie dhe Orges Jahelezit, person i akuzuar për trafik droge në kuadër të dosjes 339. Policia e Shtetit ka përcjellë në zyrat e Prokurorisë speciale SPAK, 15 dosje hetimi pasuror ndaj personave të dënuar ose nën hetim të cilëve u është kërkuar të tregojnë burimin e pronave bazuar në paketën anti-KÇK.

13 raste janë në verifikim nga prokurorët e SPAK, ndërkohë që dy dosje, një prej të cilave ajo e Lulzim Berishës, prokuroria ia ka kthyer policisë për plotësim me dokumente shtesë. Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së. Më pas, përgjigjet e marra do t’i dërgohen SPAK-ut, për veprime të mëtejshme. OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.