Drafti “Ahmetaj” në Kuvend: 6 % TVSH për portalet

Ligji për “Tatimin mbi vlerën e shtuar” pritet të ketë sërish ndryshime pasi hasi në kundërshtinë e mediave online. Ish ministri i Financave, njëkohësisht edhe kryetari i komisionit të Ekonomisë Arben Ahmetaj ka depozituar në Kuvend projektligjin që tatimi prej 6% për furnizimin e shërbimeve të reklamave në radiotelevizionet, të aplikohet edhe për ofruesit e mediave elektronike.

Ahmetaj: “Aktualisht media elektronike dhe ofruesit e sherbimit te publikimeve elektronike qe operojnë ne tregun mediatik, nuk rregullohen nga ligji. Për këtë arsye, ndryshimi i propozuar konsiston, ne përfshirjen e fuqizimit te shërbimit të ofruesve te shërbimit te publikimeve elektronike, ne skemën e shkalles se reduktuar te tatimit mbi vlerën e shtuar.”

Deri në 2018 portalet ishin të përjashtuar nga TVSH, por ndryshimet e qeverisë në Nëntor të 2018 u kundërshtuan nga drejtuesit e mediave elektronike, pasi sipas tyre ato duhet të pagonin taksën në nivelin 20%.

Ahmetaj: “Ky propozim do të mundësojë një trajtim të barabartë dhe jo diskriminues midis ofruesve të shërbimeve audiovizive dhe elektronike”.

Pavarësisht se ligji është miratuar në Kuvend, ende Ministria e Financave nuk ka nxjerrë aktet nën ligjore për zbatimin e tij.