Drafti anti-shpifje, Fitim Zekthi: Edhe të marrësh ajër duhet të jesh me Ramën

Analisti Fitim Zekthi teksa ka komentuar projektligjin anti-shpifje i jep AMA-s dhe AKEP të drejtën për të gjobitur mediat. I ftuar në rubrikën ‘Opinion’ në ‘News24’ Zekthi tha se pavarësisht këtij kontrolli, të vërtetat ende dalin në publik.

Duke i cilësuar dy institucionet AKEP dhe AMA-n si ‘policë’ që mbrojnë kryeministri Rama, analisti tha se diktaturat vijnë butësisht duke u zgjeruar. Mes të tjerash analisti thekson se Rama kërkon të uzurpojë edhe mediat, për shkak të pasigurisë dhe tensionit që ai ndjen, ndërsa shtoi se në zgjedhjet e ardhshme kjo qeveri nuk do të arrijë të marrë 71 mandate.

“Shpifja në Shqipëri është e dënueshme. Ajo që kërkohet është që mes dy institucioneve AMA dhe AKEP, t’u jepet atyre e drejta që të gjobisin dhe të mbyllin një TV apo portal online nëse konstatohet që kanë bërë shpifje. Ky është problem shumë i madh. Pasi në radhë të parë në mënyrë arbitrare dy institucione që janë qeveritare, pavarësisht se zgjidhen nga parlamenti, që do të vendosin nëse është shpifje apo jo një gjë. Gjëja e dytë është që konteksti që jetojmë në Shqipëri është që ne vuajmë nga kontrolli që ka qeveria mbi mediat. Sot në Shqipëri media nuk është e pavarur. Regjimet ushtarake, despotike, për të kontrolluar mediat kanë dhunën. Sot në Shqipëri që të marrësh edhe ajër duhet të jesh me kryeministrin. Për fat të mirë apo të keq të kryeministrit disa të vërteta do të dalin në media. AKEP dhe AMA s’do jenë asgjë më shumë, por do mbrojnë kryeministrin, ‘policë’ të tij. Liria e mediave ka për detyrë që të mbrojë të vërtetën, popullin. Ai po shndërrohet në një mekanizëm që t’i shërbejë qeverisë. Qytetarët i bie që të ushqehen nga lajmet që prodhon qeveria. Nuk mund të pranojë qeveria shqiptare që të thuhet se; “kjo është qeveri që ka lejuar kriminelët të hyjnë në parlament”. Qeveria është problemi themelor i demokracisë. Ai ka përdorur fjalë të rënda, që s’mund t’i themi (Rama). I tha një qeni; ‘o analist’. Shqipëria është në sovranitet të kufizuar. Është një vend i pavarur për shkak të ndërkombëtarëve, sidomos të SHBA.

Kur qeveritë uzurpojnë pushtet, janë në fundin e tyre. Fakti që është në tension dhe kërkon të uzurpojë, (Rama) ka pasiguri dhe kërkon që të ndalet e vërteta. Ai do të gjobisë mediat, do të kërcënojë, por s’do t’ia dalë dot. Kjo rrugë e zymtë është e dhimbshme, por ka dritë brenda. Jam i bindur se në zgjedhjet e ardhshme, sado që të bëjë kjo qeveri, s’do t’i marrë dot kurrë 71 mandate. Kjo rrugë s’ka kthim. Njerëzit hyjnë në këtë rrugë për shkak të zullumit. Zullumi këputet kur trashet, jo kur hollohet. E vërteta s’do të ndalet së thëni. Jam mahnitur vjet për një protestë të emigrantëve. Më bënë përshtypje disa fjalime të disa njerëzve. Kanë qenë deklarata konceptuale. Kishte dhe shqiptarë që janë këtu dhe thoshin; ky kryeministër nuk mund të nxjerrë zvarrë. Brenda këtij populli vlon diçka, por mund të bjerë pushteti për pika uji. Për disa pika uji kanë rënë diktatorët. Me pasojat e tërmetit kjo qeveri ka dështuar. Nuk kishte asnjë lekë në arkën e shtetit.”, -tha analisti Zekthi.