Drafti për ndryshimet në Kodin Penal: 1 vit burg për memet në rrjetet sociale! Gjoba për mediat

Ministria e Drejtësisë dhe një grup ekspertësh të së drejtës janë duke hartuar ndryshimet e reja në Kodin Penal, i cili pritet të miratohen në Kuvend. Projekti drafti i ekspertëve ka dy nene që merren posaçërisht me shpifje dhe prekin mediat dhe qytetarët që përdorin rrjetet sociale.

Një prej  ndryshimeve të propozuara parashikon ashpërsimin e masave për publikimet në median online dhe rrjetet sociale. Në këtë rast ligji nuk prek vetëm mediat, por çdo qytetar që përdor platformat online.  Konkretisht, projekti i ndryshimeve në Kod ndalon publikimin e foto apo videomontazheve.  Sipas parashikimeve të projektligjit, kur dikush, qytetar apo media publikon një montazh ndaj një personi pa pëlqimin e tij, dënimi është deri me 1 vit burg.

Ky projektligj që ende nuk ka marrë vulën përfundimtare nga Ministria e Drejtësisë nëse do të kalojë në këtë formë në Kuvend, është vendosje e censurës në format më të ashpra të saj. Montazhet e fotove, përdoren në masë të madhe në rrjetet sociale nga qytetarët kundër personazheve politikë apo drejtuesve të institucioneve. Me këtë projekt, qeveria vendos censurën ndaj kujtdo zëri publik që kritikon, ironizon apo tallë zyrtarët e drejtues politikë.

Projekti i Rilindjes shkon edhe përtej ligjit të medias. Vetëm me anë të një neni, PS vendos nën kontroll mediat, por dhe këdo qytetar që mund të përdor imazhe të njerëzve publikë në adresat e tij personale.

Drafti i ekspertëve të Ministrisë së Drejtësisë për Kodin Penal kriminalizon shpifjen në rrjetet sociale dhe për mediat. Konkretisht, sipas projektit të Ministrisë thuhet se kur atakohen personat publikë apo zyrtarët shtetërorë gjoba që parashikohet në këtë rast është nga 50 deri në 150 mijë lekë të reja. Për median kjo gjobë është dyfish.

“Përhapja e qëllimshme e deklaratave rreth një fakti specifik të rremë dhe ofendues ndaj personit si dhe/apo çdo informacioni tjetër të rreme, që cenojnë nderin dhe reputacionin e personit, përbën kundërvajtje penale dhe dënohet me gjobë nga pesëdhjetë mijëderi në një milion e pesëqind mijë lekë dhe dënimin plotësues të përgenjeshtrimit dhe faljen publike ndaj viktimës”,– thuhet në pikën 1 të nenit 227.

Ndërkohë në rastet e medias, veç gazetarit, përgjegjësia ligjore përfshin edhe drejtuesit e medias. “Kur vepra penale e shpifjes është kryer me anë të shtypit, përgjegjësia shtrihet edhe për drejtorin administrues ose, sipas rastit, zv/drejtorin, botuesin dhe printuesin ne rastet e dijenisë së tyre rreth faktit penal. Dënimi penal shoqërohet edhe me dënimin plotësues të përgënjeshtrimit të deklaratës/faktit/informacionit të rremë me të njëjtën mënyrë dhe me të njëjtin mjet sikundër është realizuar përhapja e tij, dhe detyrimin e publikimit të vendimit gjyqësor penal nëpërmjet medias apo në komunitet”,- thuhet në draftin e përgatitur nga PS.

Diktaturë të tillë ndaj medias dhe ndaj qytetarëve në rrjetet sociale nuk ka vendosur as presidenti bjellorus që njihet si diktator.

Kreu i qeverisë, Edi Rama ka reaguar për idenë që po gatuhet nga ekspertët në Ministrinë E Drejtësisë duke u distancuar nga ky projekt. Rama shkruan me ironi në rrjete sociale se ky lajm ka revoltuar ca analistë, ndërsa thekson se nuk ka shans që të ndalohen memet.
“Shih shih qenkan revoltuar ca analistë se do u dënokan memet me Kod Penal, duke u nisur nga s’di ç’material jozyrtar! Po si mund të ndalohen memet me ligj na e thonë dot këta orakuj të kombit? Asnjë shans s’ka, ku ta gjenim që dhe këta të merreshin me meme që të vlenin për diçka!”,- shkruan kreu i qeverisë në një postim në Twitter.

Në një prononcim për “Koha Jonë” ministria e Drejtësisë pranoi se egzistencën e draftit duke theksuar se është një material pune dhe jo një dokument përfundimtar. “Sqarojmë se dokumenti që po qarkullon nuk është draft final, pasi po punohet në vazhdimësi. Ministria e Drejtësisë ka përmbyllur procesin e konsultimit publik dhe tani ekspertët dhe praktikantët e ligjit të grupit të punës do të finalizojnë projektligjin, i cili pasi të konsultohet teknikisht, do të depozitohet në Këshillin e Ministrave”,- deklaroi Ministria e Drejtësisë.

SHKARKO APP