Dritë jeshile për hapjen e negociatave, Holanda: Të mbahet Konferenca e Parë Ndërqeveritare BE-Shqipëri

Më në fund Parlamenti holandez ka mbështetur vendimin e qeverisë së Holandës, e cila është pro caktimit të datës së konferencës ndërqeveritare Shqipëri-BE që i jep dritë jeshile hapjes reale të negociatave. Vendimi u përcaktua ditën e sotme në mbledhjen e Komisionit të Jashtëm në parlamentin holandez, dhe nesër pritet të konfirmohet nga seanca plenare.

Edhe ambasada holandeze në Tiranë, konfirmoi se Holanda ka rënë dakord për mbajtjen e Konferencës së Parë Ndërqeveritare me Shqipërinë. Ambasada njofton se shumica e parlamentit ra dakord, dhe shton se procedura do të finalizohet nesër me votimin e mocioneve të mundshme të ngritura nga partitë apo grupet parlamentare.

“Sot, shumica e parlamentit ra dakord që të mbahet Konferenca e Parë Ndërqeveritare me Shqipërinë, pas miratimit të kuadrit negociator. Procedura do të finalizohet nesër me votimin e mocioneve të mundshme të ngritura nga partitë apo grupet parlamentare”, njofton ambasada mes të tjerash.