Droga ”tullumbace”, mjeku toksikolog: Shkakton edhe arrest kardiak

Mjeku toksikolog Alert Drishti, ka folur në lidhje me drogat e reja që kanë qarkulluar së fundmi në kryeqytet, mes tyre edhe tullumbacet me oksid azoti. Ai tha se përdorimi i kësaj droge dëmton në mënyrë direkte trurin, zemrën dhe mushkëritë. Për të gjatë konsumit të saj truri nuk furnizohet më me oksigjen, por me substancën e caktuar dhe kjo shpie deri në arrest kardiak dhe humbje të jetës.

”Oksidi i azotit nuk klasifikohet si një drogë, por si një përbërje e dëmshme për shëndetin. Dëmton kryesisht mushkëritë, trurin e zemrën dhe dëmet mund të shkojnë deri në vdekje. Me tullumbacë nuk është e thënë vetëm oksidi i azotit, por edhe drogëra të tjera të gazta, si heliumi që klasifikohet si drogë.

Të gjitha substancat e gazta shkëpusin oksigjenin nga gjaku dhe truri nuk furnizohet me oksigjen, por me substancën që merret. Oksidi i azotit dëmton rruazat e kuqe të gjakut dhe kalon në tru. Kohët e fundit kemi pasur raste pacientësh nga përdorimi i drogave të tilla, edhe pse jo raste të rënda”,-tha mjeku.