“Dumani, kampion i luftës anti-korrupsion”, Hajdarmataj: Vlerësim! Hasanaj: Mbrojtje për SPAK-un
Në emisionin ”Open” është diskutuar mbi vlerësimin që iu bë kreut të SPAK, Altin Dumani si kampion i luftës kundër korrupsionit dhënë nga sekretari Amerikan i Shtetit, Antony Blinken. Arben Hajdarmataj, ish-drejtues në Policinë e Shtetit tha se janë dy aspekte, në anën politike është vlerësim.
“Në aspektin teknik kjo ha diskutim, pra nëse jemi në ato nivele që ne të vlerësohemi. SPAK u ngrit me një rol të rëndësishëm të SHBA dhe normalisht mendoj se investimi i SHBA do mbrohet prej tyre dhe do komentohet shumë i frytshëm. Në çështjen e perceptimit të publikut nuk mendoj se është një qasje e drejtë. Mendoj se është një çmim i dhënë për procedurë”, tha Hajdarmataj.
Andi Hasanaj, avokat, tha se ky vlerësim është një mbrojtje ndaj SPAK, i cili është vënë nën sulme dhe akuza. ”Titulli iu dha Dumanit, por është një mbështetje që iu dha gjithë strukturës së SPAK dhe BKH-së”, tha Hasanaj. Ai shtoi se SPAK ka dhënë goditje dhe ky është fakt, a duhej bërë më shumë, kjo mund të diskutohet. Avokati tha se deri më tani ka bërë një punë goxha të vlerësueshme.
Gazetari Fatjon Gjinaj tha se duke parë listën e atyre që iu dhanë çmimet, i vinte keq që Shqipëria renditet mes shteteve si Uganda, Gambia, Kolumbia apo të tjera vende. ”Ky është një vlerësim që vjen në përfundim të mandatit nga administrata Biden, e cila ka dhënë edhe kontributin më të madh për këtë reformë në drejtësi që kemi. Duhet të justifikohen me veten se ku kanë përfunduar paratë e taksapaguesve amerikanë”, tha ai.
