E moshuara me koronavirus rëndë në Spitalin e Durrësit, anulohet transporti për në Tiranë

E moshuara e prekur nga koronavirusi, që rezultoi rasti i parë në qytetin bregdetar të Durrësit, konfirmuar paraditen e djeshme, ndodhet në gjendje kritike për jetën.

Burime për “Panorama” thanë se pacientja po mbahej e izoluar në Spitalin Rajonal të Durrësit, konkretisht në repartin e Infektivit nën kujdesin e stafit mjekësor. Këta të fundit, për shkak të gjendjes së saj të rënduar, menduan ta nisin në Repartin e Infektivit në Tiranë, por ajo nuk e përballonte dot udhëtimin, ndaj e kanë rifutur sërish në reanimacion.

Në fotot që ka siguruar gazetari i Panorama, shihet momenti kur stafi po e nxjerr nga autoambulanca të moshuarën, e cila ka që ditën e djeshme që nuk ka urinuar, dhe mësohet se veshkat e saj janë jashtë funksionit.

Pacientja kishte ditë që qëndronte në spital e shtruar me pneumoni.

75-vjeçarja ka qëndruar për disa ditë me radhë në kontakt të vazhdueshëm jo vetëm me stafin mjekësor dhe pacientët e tjerë, por edhe me familjarë të ndryshëm që shkonin për të vizituar të afërmit e tyre në spital.

Në këto kushte, dyshohet se ka infektuar edhe persona të tjerë nga stafi apo edhe pacientë e familjarë të tyre. Mësohet se 75-vjeçarja ishte kthyer pak ditë më parë nga Italia, ndërkohë që kishte marrë pjesë edhe në një ceremoni mortore te të afërmit e saj.