Ekspertët bëjnë sot këqyrjen e mjetit nga ku u hap zjarr ndaj prokurorit Ndoj

Policia do të bëjë sot këqyrjen e mjetit që u gjet i braktisur në një rrugë që lidh Shkozetin me Fushë-Krujën, afër Ishmit, i cili mendohet se i përket autorëve të atentatit ku mbeti i plagosur prokurori Arjan Ndoj.

Në makinë u gjetën si provë materiale dy armë automatike tip Kallashnikov, të cilat dyshohet se janë përdorur në atentatin ndaj prokurorit Ndoj. Pasi siguroi zonën, policia vendosi që këqyrjen e mjetit ta bënin sot, për shkak se ishte natë.

Targat e makinës rezultonin të vjedhura në Tiranë.

Ekspertët presin që nga kontrolli i makinës të mund të zbulojnë shenja gishtash apo prova që do të bënte të mundur identifikimin e autorëve të atentatit ndaj prokurorit Ndoj.

Ndërkohë, policia e Durrësit ka shoqëruar mbrëmë dhjetë persona që dyshohet se mund të kishin dijeni për këtë ngjarje, por jo si të dyshuar në lidhje me krimin.