Ekspertët izraelitë në Durrës, koloneli Vach: Kur themi që apartamenti është i sigurt, është i sigurt

Koloneli izraelit, Golan Vach, foli për mediet paraditen e sotme ndërsa ishte duke inspektuar një objekt të dëmtuar nga tërmeti i 26 nëntorit në Durrës. Ai tregoi se si duhet izoluar dhe përforcuar muri i brendshëm i apartamentit në inspektim, ndërsa tha se nuk ka asnjë problem në strukturë dhe se ai mund të jetonte në të bashkë me fëmijët e tij. Vach këshilloi qytetarët që të përdorin shkumë, për të mbyllur hapësirën mes tullave.

”Unë mund të vij të jetoj në këtë apartament bashkë me fëmijët e mi. Kur themi që apartamenti është i sigurt, është i sigurt. Kur themi që do riparohet, do riparohet. Kur themi që duhet hedhur në tokë, duhet hedhur në tokë”.

Nga ana tjetër, ai tha se: ”I kanë vendosur tullat gabim, në një pjesë të madhe të objekteve që kemi inspektuar. Qytetarët duhet të përdorin shkumën për të siguruar apartamentet e tyre. Kjo e bën tullën më stabël. Është e rëndësishme për të mbyllur hapësirën mes tullave, nëse ka”.