Ekzekutimi me 3 plumba në zemër. Shokë emigrimi por sherri i ndau

Kishte ardhur në Tiranë për ceremoninë mortore të gjyshes së tij por mbrëmjen e së hënës plumbat i morën jetën. 28-vjeçari Vilson Tafçiu ishte ulur me disa persona në një lokal në zonën e Astirit, kur autorët e thirrën në emër dhe e ekzekutuan me tre plumba në zemër. Policia e Shtetit është vënë në kërkim të Noel Dishës.

Me origjinë nga Dibra por që prej vitesh jetonte në Sukth, mësohet se mes tij dhe viktimës ka pasur njohje me njëri-tjetrin, si dhe kanë pasur një konflikt të vjetër mes tyre kohë më parë kur jetonin në Francë.

Familjarët e Noel Dishës gjithashtu e njihnin viktimën, Vilson Tafçiun, madje ata kishin dijeni sipërfaqësore për konfliktin mes djalit të tyre dhe Tafçiut, këtë e kanë pohuar edhe pas marrjes në pyetje nga oficerët e policisë.

Autori i kësaj vrasje, i shpallur tashmë në kërkim, rezulton të ketë edhe dy emra të tjerë, N.K dhe M.P, të cilët janë shpërndarë në çdo pikë kufitare për mos lejuar kalimin e tij jashtë vendit. Deri më tani nga verifikimet nuk rezulton që ai të ketë dalë jashtë territorit të Shqipërisë.