Elbasan dhe Korçë, fluks në spital prej virozave

Situata me virozat në vend është shqetësuese. Në pediatrinë e Elbasanit çdo ditë paraqiten për të marrë ndihmën mjekësore rreth 150 fëmijë me simptoma të gripit. Javët e fundit. epidemitë e përhapura në vende të ndryshme të botës kanë shtuar panikun te prindërit të cilët paraqiten në spital për të kërkuar ndihmë më të specializuar duke neglizhuar mjekun e familjes.

Mjekët qetësojnë se pavarësisht fluksit, bëhet fjalë për grip stinor duke dhënë edhe këshillat përkatëse. Komplikacionet e gripit nuk kanë munguar. Në pediatrinë e Elbasanit janë 30 fëmijë të shtruar, kryesisht me bronkopneumoni dhe bronkolite.

Edhe në Korçë shifrat e të prekurve nga virozat janë rritur ndjeshëm. Më të ndjeshëm ndaj virozave mbeten fëmijët të cilët i janë drejtuar shërbimit spitalor për t’u trajtuar. 100-150 raste të prekura nga gjendje gripale raportohen nga pediatria çdo ditë ndërkohë që sipas mjekëve gjate fundjavës ky fluks rritet.

Sipas të dhënave, fëmijët jo pak herë e kanë pasur të domosdoshme shtrimin në spital për shkak të gjendjes së rënduar ndërkohë që ata nuk kursejnë këshillat për prindërit sidomos shmangien e ambienteve kolektive. Mesatarisht 6-7 fëmijë shtrohen çdo ditë në spital për të marrë kujdesin e stafit mjekësor.