Erion Veliaj: Jam gati të përballem me kundërshtarin politik për zgjedhjet vendore

Kryetari i Bashkisë së Tiranës Erion Veliaj deklaron se është gati që të përballet me kundërshtarët e tij politikë në zgjedhjet e ardhshme vendore. Në një intervistë në Klan News, Veliaj theksoi se strategjia që ai ka zgjedhur bashkë me kryeministrin dhe ministrat është puna e përditshme.

“Fushata e përditshme si e kryeministrit, si e imja dhe e gjithë anëtarëve të qeverisë vazhdon në çdo moment. Në çdo moment jemi duke punuar jo se ka fushatë, por kështu kemi filluar çdo ditë. Pra, ritmi i punës së Bashkisë së Tiranës ka qenë i përditshëm dhe kur ka pasur pandemi, kemi qenë për dezinfektim, për të çuar ushqime, për të çuar ilaçe, dhe kur ishte tërmeti pavarësisht se kishte lëkundje stafi i emergjencave dhe zjarrfikësit u morën me vlerësimet e objekteve. Për ne se është ditë, se është natë, se është dimër, se është verë, se është fushatë, se është një vit normal, kemi punuar me të njëjtin ritëm. Unë besoj se strategjia që të shërbejmë me përulësi, me këmbë në tokë dhe t’i përgjigjemi nevojave të emergjencave të momentit pavarësisht rrethanave besoj se është strategjia më e mirë. Kushdo që të jetë kundërshtari, kurdo që të caktohet data nga presidenti, ne jemi gati që të vazhdojmë të shërbejmë”, theksoi ai.

I pyetur nëse do të rikonfirmohen edhe kryetarët e tjerë aktualë të bashkive që bëjnë pjesë në qarkun e Tiranës, Veliaj i cili mban dhe detyrën e drejtuesit politik, theksoi se ndihet krenar për kolegët e tij që kanë arritur rezultate të suksesshme krahasuar me paraardhësit e tyre. “Unë jam krenar për të katër kolegët dhe kur të kërkohet rekomandimi im në Kryesi, pra për të bërë atë formalizimin zyrtar, sigurisht që do të jap një mendim pozitiv për të katër kolegë që në kushte spartane, kanë arritur rezultate të suksesshme krahasuar me paraardhësit e tyre”, nënvizoi Veliaj.

Nga ana tjetër opozita duket e hallakatur si në strategji opozitare në raport me qeverinë qendrore, ashtu edhe me gjetjen e një kandidati potencial përballë Veliajt.

E vetmja kandidate që mund ta rivalizonte Erion Veliaj, deputetja demokrate Jorida Tabaku, duket se nuk do të ketë asnjë shans nga PD e Berishës që të kandidohet në emër të opozitës së bashkuar.

Jorida Tabaku me personalitet të fortë tiranas, shikohet nga kampi berishian si njeri i Lulzim Bashës.

Për momentin kampi i Erion Veliajt në Bashki është shumë pikë para opozitës në sondazhe.