Eugena Tomini, emërohet zv/ministre e Shëndetësisë

Nga shefe e Survejancës dhe Shërbimit të Inteligjencës Epidemike në Institutin e Shëndetit Publik, Eugena Tomini, emërohet si zv/ministrja e katër e Shëndetësisë dhe e Mbrojtjes Sociale. Tomini ka qenë shumë aktive gjatë pandemisë së Covid-19, ndërsa është pjesë e Komitetit Teknik të Ekspertëve.

Pas këtij emërimi Ministria e Shëndetësisë dhe Mbrojtjes Sociale bëhet me 4 zv/ministra. Aktualisht këtë post e mbajnë edhe Mira Rakacolli, Albert Nikolla dhe Bardhylka Kospiri. Nuk dihet se kush do të jetë drejtuesi i ri në Survejancën dhe Shërbimin e Inteligjencës Epidemike në Institutin e Shëndetit Publik.

Pak kohë më parë pati të tjera ndryshime në qeverinë Rama, pas largimit të Gent Cakaj nga Ministria për Evropën dhe Punët e Jashtme, në krye të të cilës u emërua Olta Xhaçka. Ndërkohë, në krye të Ministrisë së Mbrojtjes u emërua Niko Peleshi. Në krye të Ministrisë së Brendshme, në vend të Sandër Lleshaj u emërua Bledi Çuçi, ndërsa Milva Ikonomi zëvendësoi këtë të fundit në krye të Ministrisë së Bujqësisë.