Eugena Tomini: Nëse situata vazhdon kështu, do të shtrëngohen masat!

Zëvendës ministrja e Shëndetësisë, Eugena Tomini paralajmëroi se nëse shifrat e të infektuarve vijojnë të larta edhe në ditët në vazhdim, atëherë Komiteti i Ekspertëve do të shtrëngojë masat. Në një intervistë për edicionin qendror të lajmeve në “Vizion Plus”, Tomini deklaroi se pritshmëritë janë që edhe për javët në vijim numrat të jenë të lartë.

“Sigurisht që tendenca e ditëve të fundit ka treguar për një rritje të rasteve pozitive, e reflektuar edhe tek projeksionet tona, duke parë grumbullimet e qytetarëve në dhjetor, për të festuar apo lëvizjet jashtë Tiranës. Kemi parashikuar një tendencë në rritje në javët në vijim. Tri ditët e fundit kanë reflektuar mbi 1 mijë raste, kemi një pozitivitet shumë të lartë dhe nivel transmetueshmërie shumë të lartë.

Të gjithë bashkë jemi pjesë e të tërës, të gjitha masat duhet të japin efektet e tyre. Situata po monitorohet në dinamikë. Vlerësimi i masave shtrënguese po kryhet, nëse kjo situatë do të përshkallëzohet. Nëse situata do të vazhdojë kështu dhe vlerësimi i të gjithë indikatorëve do të përshkallëzohet me një numër më të lartë pozitiviteti, masat do të jenë shtrënguese”, deklaroi Tomini për “Vizion Plus”.