Europol aksion në 26 shtete. Në Shqipëri 28 të arrestuar me a*më e drogë

Një operacion i përbashkët kundër trafikut të armëve, trafikut të drogës, emigrantëve dhe trafikut të qenieve njerëzore, u ndërmor në 26 vende, përfshirë edhe Shqipërinë. Në vendin tonë në pranga ranë 28 persona, u sekuestruan armë zjarri, 81 kg kanabis dhe doza kokaine gjatë operacionit ku u përfshinë 315 punonjës të Policisë së Shtetit.

Nga 566 persona të arrestuar në BE, 28 prej tyre janë kapur në vendin tonë. Operacioni u zhvillua me mbështetjen e Europolit dhe agjencive të tjera ligjzbatuese europiane. Nga të dhënat, policia shqiptare kontrolloi 2648 subjekte, 1525 persona, 987 mjete, 40 pako postare dhe 92 ambiente të tjera.

Operacioni u ndërmor në 26 vende në të gjithë Evropën midis 13 dhe 18 nëntorit dhe përfshiu edhe kontrollet e intensifikuara në kufijtë e jashtëm të BE-së.

Më shumë se 22 mijë oficerë u angazhuan në operacion, ndërsa në total janë arrestuar 566 persona, 218 për trafikimin e personave, 186 për trafikimin e drogës si dhe 69 për trafikimin e armëve. Janë sekuestruar 310 armë zjarri, municion luftarak dhe rreth 1 ton drogë, 626 kg kokainë, gati 300 kg kanabis, heroinë dhe lëndë të tjera narkotike.