Falja Natën e Kadrit nesër në mbrëmje në bulevardin “Dëshmorët e Kombit”

Falja e Namazit Natën e Kadrit do të kryhet në bulevardin “Dëshmorët e Kombit (para ish-Hotel Dajtit), bëhet e ditur nga Komuniteti Mysliman i Shqipërisë.

Përmes një njoftimi për shyp mësohet se falja e namazit Natën më të mirë se një mijë muaj do të kryhet në orën 22:00 të dielën e 10 qershorit.

“Komuniteti Mysliman i Shqipërisë, duke parë numrin e besimtarëve gjithnjë e në rritje nga viti në vit, për të cilët hapësirat e xhamive të Tiranës janë të pamjaftueshme edhe në netë normale të Ramazanit dhe për ta vlerësuar bashkarisht “Natën e Kadrit”, e cila është më e vlefshme edhe se sa njëmijë muaj, falja e namazit të teravisë do të kryhet në bulevardin “Dëshmorët e Kombit” (para ish-Hotel Dajtit).

Krahas faljes së namazit të jacisë dhe të teravisë do të ketë edhe lexim Kur’ani, ligjërata të shkurtra nga drejtues të Komunitetit Mysliman dhe hoxhallarë të nderuar: Përshëndetjet: Kryetari i KMSH-së, H. Skender Bruçaj dhe Myftiu i Tiranës, z. Ylli Gurra 
Referate: Elvis Naçi, Ahmed Kalaja

Kur’an: Egzon Ibrahimi

Falja e namazeve: Lauren Luli, Elton Karaj, Bilal Teqja, Mikel Hazizolli, Veton Tulla

Lutje: Bujar Spahiu, Bilal Teqja

Falja e Jacisë dhe e teravisë do të shoqërohet me ligjërata nga të sipërpërmendurit, dhe në fund dua dhe lutje.