Familja Berisha nën hetim nga SPAK për pastrim parash, përgatit kundërsulm të egër ndaj prokurorëve

Nga Adriatik Doçi

Dy investigime të Report Tv mbi korrupsionin madhor të Familjes Berisha dhe pastrimin e dyshuar të parave përmes investimit në pasuri të paluajtshme, kanë vënë lëvizje SPAK-un.

Për herë të parë, Prokuroria e Posaçme po heton lëvizjen e parave të Shkëlzenit për ngritjen e fabrikës së përpunimit të boronicave në Gërdec, kamufluar me një kredi 1.8 milionë euro, e dyshuar si fiktive.

I gjithë investimi shkon mbi 3.5 milionë euro, vlerë e cila nxjerrë zbuluar Shkëlzenin, edhe pse në lojë ka futur një oligark, i cili po e financon me kontrata fiktive si kthim nderi ndaj Berishës, për favorizimet kur ishte në pushtet.

SPAK po heton ndërkohë edhe historinë e rrëmbimit të pronës shtetërore ish-Klubi Partizani nga Sali Berisha, duke e kaluar në emrin e dhëndrit. Mbi pronën e grabitur falë vjehrrit, dhëndri Jamarbër Malltezi ka ngritur 18 kulla me vlerë dhjetëra miliona euro, me burim të pajustifikuar.

Investigimet e plota dhe të thelluara kanë konfirmuar se në xhepat e Argitës dhe Shkëlzenit kanë shkuar paratë e aferave të Sali Berishës me pasuritë publike, gjatë pushtetit të tij 2005-2013, me përfshirjen e klientëve të ndryshëm shqiptarë dhe serbë. Klientët kanë marrë favore nga qeveria Berisha, ndërsa në këmbim kanë sajuar kontrata duke u dhënë para Shëlzenit dhe Argitës.

Për herë të parë Sali Berisha ndien pafuqinë e tij, pasi e sheh veten subjekt të drejtësisë së re, të cilën e ka mallkuar dhe luftuar prej 6 vitesh, me në krah aleatin e tij, Ilir Metën.

Frika nga veprimi i SPAK, rreziku i konfiskimit pasurive të paligjshme në emër të fëmijëve, arrestimi i mundshëm i Shkëlzenit, Jamabrit dhe Argitës për pastrim parash, mashtrim me pasurinë, falsifikime, korrupsion etj., e ka shtyrë Berishën të mbajë fort Bashën në krye të PD dhe të marrë në mbrojtje Ilir Metën, duke u pozicionuar kundër shkarkimit të tij.

Me thellimin e hetimeve dhe tërheqjen në dritë të fijeve të pasurimit të Shkëlzenit, Argitës dhe Jamarbrit, ndaj SPAK pritet të nisë një sulm i egër nga mediat në patronazhin e Familjes Berisha.

Kështu u veprua edhe pas hetimeve për Gërdecin dhe 21 Janarin, por tashmë rrethanat kanë ndryshuar. Parashikohet një verë me ethe dhe më pas një vjeshtë me atake paniku për Familjen Berisha.(Shqiptarja.com)