Familja e tifozit që vdiq në stadium: Do ta gjejmë vetë policin që e shtyu!

Dëshmitarët kanë thënë se Mikel Selmani u shty nga një polic në shkallët e stadiumit të Vlorës dhe pas kësaj gjeti vdekjen.

Ky është versioni që besojnë familjarët e tij.

Ata kërkojnë gjetjen e policit që shkaktoi vdekjen e tifozit, nga prokuroria.

Daja i tij, Xhelil Xhelilaj tha se nipi është shtyrë, ndërsa qëndronte me duar në xhepa.

“Dua të them se Policia dhe Prokuroria duhet të zbardhin ngjarjen dhe të mos fshijnë faktet, sepse ne do t’i gjejmë vetë faktet, madje dhe emrin se kush e shtyu djalin tonë në kohën që po ikte nga shkallët, i qetë dhe me duar në xhepa”, tha ai për ABC News.

Familjarët thanë se ngjarja duhet të zbardhet, edhe nëse ka qenë aksidentale.

“Ai polici mund ta ketë shtyrë edhe pa dashje, por ky njeri duhet të mbajë përgjegjësinë që i takon.

Pra ne kemi të dhëna se ai është shtyrë në momentin që ka pasur duart në xhepa dhe pa mendje.

Nuk ka rrëshqitur vetë, në asnjë mënyrë!

Nëse do të kishte rrëshqitur vetë, do të kishte marrë dhe dëmtime të tjera të trupit, ndërsa ai ka vetëm një goditje në kokë, në pjesën e parë të ballit dhe kaq.

Me atë goditje ka gjetur vdekjen” eshte shprehur Xhelilaj.