Familja Gjyli kalon dimrin e dytë pa mbrojtje nga shiu: Çdo cep i çadrës është me ujë

Dimri i dytë sërish e ka gjetur në çadër familjen e Myslym Gjylit në Gjuriçaj të Durrësit. Reshjet e shumta të shiut që kanë sjellë edhe përmbytje e kanë vështirësuar akoma më shumë jetesën e përditshme. Ai tregon se shiu ka depërtuar duke hyrë brenda strehëzës dhe i ka detyruar të hedhin shumë veshmbathje, dhe orendi shtëpiake.

“Çdo cep i çadrës është me ujë, ftohtë i tmerrshëm”,-thotë i moshuari. Myslym Gjyli tregon se ka trokitur në shumë dyer institucionesh kompetente për të kërkuar ndihmë pas vlerësimit të dëmit. “Kam shkuar te zyra e informacionit në Durrës kam bërë ankesë-kërkesë, asgjë deri tani. Vijnë dhe ikin, diçka do të bëhet për ty por kur?”.

Me dëshpërimin që lexohet tek sytë e tij, shpreh se për të ka shumë kohë që nuk e ndjen aromen e shtëpisë. Netët e dimrit janë të ftohta në çadrën e tyre dhe thotë se sëbashku me bashkëshorten e tij bien në gjumë herët për tu zgjuar po herët në mëngjes, duke shpresuar se dita e re do të sjellë për ta triumfin e shpresës.

”Gjithë ditën duke hapur sytë se po vjen ndonjë inxhinier. Shumë e tmerrshme, nëse e ke inat tjetrin i thuaj “të pafsha në çadër”,-thot më tej Myslym Gjyli. Procesi i rindërtimit të banesave të tërmetit po ecën me ritme shumë të ngadalta. Apeli për ndihmë i kësaj familjeje shkon ndaj të gjithë institucioneve kompetente dhe çdokujt që e dëgjon thirrjen, individi apo biznesi, për të kthyer vëmendjen në mënyrë që të përmbushin sadopak minimumin jetik.