Fatura 45 mln USD në favor të kompanisë greke, zbardhet vendimi për rrugën Tiranë-Elbasan. Arbitrazhi: Shqipëria shkeli kontratën

News24 zbardh vendimin e arbitrazhit të Dhomës Ndërkombëtare të tregtisë që detyron shtetin shqiptar të paguajë rreth 45 milionë dollarë për firmën greke ‘Aktor’ për punimet shtese në autostradën Tiranë-Elbasan. Në vendim thuhet se sipas kontratës palët kishin rënë dakord për ngritjen e një Bordi Mosmarrëveshjesh për zgjidhjen e me konsensus të pretendimeve që palët mund të kishin gjatë zbatimit të projektit. Nëse një nga palët nuk ishte dakord me vendimit e bordit atëherë mund t’i drejtohej arbitrazhit ndërkombëtar dhe konkretisht në Gjykatën e Dhomës ndërkombëtare të Tregtisë.

Mosmarrëveshjet mes konsorciumit ndërtues dhe Autoritetit Rrugor të Shqipërisë lindën në vitin 2015, kur ndërtuesi paraqiti dy kërkesa për pagesë kostosh shtesë të punimeve për Segmentin III (Tiranë deri në hyrjen e tunelit) dhe Segmentin I (nga dalje e tunelit deri ne Elbasan) të autostradës, përkatësisht me vlerë 11,6 milionë dollarë dhe 25,2 milionë dollarë. Pas një kalvari burokracish në korrik të 2017 palët kanë rene dakord për të amenduar kontratën duke ngritur edhe një bord për zgjidhje e mosmarrëveshjeve. Vendimet e bordit nëse nuk apelohen brenda 28 ditësh atëherë janë të detyrueshme për t’u zbatuar. Ky bord më pas me dy vendime; 7 shtator dhe 9 tetor të 2017 ka vendosur që pala shqiptare t’i paguaj për punime shtesë kompanisë greke dy fatura të kripura prej 11,6 milionë dollarë dhe 25,2 milionë dollarë. Duhet theksuar se gjithë procedura që nga ngritja e bordit deri në marrjen e vendimeve është bërë gjatë tranzitimit të qeverisë pas zgjedhjeve të 2017, ku Partia Socialiste fitoi mazhorancën parlamentare, dhe dikasteri i rrugëve dhe Ministria e Transporteve që deri në atë kohë drejtoheshin nga LSI kaluar në duart e PS.

Me vënien e Damian Gjiknurit në krye të Transporteve dhe ndërrimin e drejtuesve të ARRSH, faturat madje nisën disa audite, por nga ana tjetër pretendimet e palës greke nuk kontestuan brenda afatit 28 tetor. Kaq i ka mjaftuar kompanisë ndërtuese t’i drejtohej arbitrazhit ndërkombëtar. Në 15 tetor të 2018-ës ka shkuar kërkesa në gjykatën e Dhomës Ndërkombëtare të Tregtisë, nga ‘Copri contruction’ dhe Aktor, pala shqiptare është mbrojtur kryesisht me faktin se arbitrazhi ndërkombëtar nuk ka juridiksion për gjyqin, çka është rrëzuar nga tribunali. Ndërkohë arbitrazhi e ka quajtur të vlefshme amendimin e kontratës dhe ngritjen e bordit të mosmarrëveshjeve si dhe ka detyruar shtetin shqiptar të paguajë dy faturat e pretenduara nga kompanitë greke me një total prej 45 milionë dollarësh amerikanë, duke përfshirë dhe TVSH-në dhe shpenzimet gjyqësore.

BalkanWeb