Festat, OSHEE: Përballuam defektet, furnizim pa ndërprerje
Operatori i Shpërndarjes së Energjisë Elektrike (OSHEE), arriti të sigurojë furnizim pa ndërprerje me energji elektrike, për konsumatorët gjatë festave të fundvitit, në sajë të investimeve dhe masave teknike që bëri vitin e shkuar.
OSHEE bën të ditur se masat e ndërmarra konsistuan në zbatimin e investimeve të reja me prioritet eliminimin e nyjeve kritike dhe stabilizimin e regjimit të punës së ngarkesave në sektorët e shpërndarjes të OSHEE-së.
Ndërsa Petraq Lika, drejtor i Divizionit të Shpërndarjes, ka deklaruar se “janë marrë masa për përballimin e situatave të emergjencës duke bërë të mundur furnizimin e konsumatoreve përmes investimeve afatgjata dhe emergjente, ku OSHEE nëpërmjet fuqizimit të nënstacionit të qendrës ka bërë shpërndarje të ngarkesave dhe ky investim ka kushtuar rreth 200 mln euro”.
Sipas OSHEE, angazhimi i madh i stafit të këtij institucioni, bëri të mundur që furnizimi me energji i konsumatorëve të përmirësohej 4 herë më mirë në krahasim me një vit më parë dhe remontet ishin të vendosura sipas standardeve europiane, ku u eleminuan risqet për ndërprerjen e energjisë.
Në terren u shpërndanë 400 brigada pune ku u angazhuan në të gjithë vendin për përballimin e defekteve në kohën e festave, periudhë në të cilën edhe konsumi i energjisë ka qenë më i lartë nga abonentët. Zyra për Kujdesin ndaj Klientin, vuri në dispozicion dispeçeritë nëpërmjet së cilës qytetarit i vihej në ndihmë në çdo kohë.
Në krye të detyrës ishin 1800 persona të cilët kanë bërë të mundur menaxhimin e situatës gjatë festave, ku në krahasim me një vit më parë ka pasur përmirësim të dukshme te furnizimit me energji elektrike.