Fico: Ulje e shtrimeve në spitalet Covid, më pak të intubuar

Drejtorja e Institutit të Shëndetit Publik, Albana Fico, në mbledhjen e Komitetit Teknik të Ekspertëve, theksoi se numri i personave të shtruar në spitalet Covid 1 dhe 2 si dhe atyre të intubuar ka pësuar ulje.

”Kemi folur edhe për numrin e bashkive të prekura, të cilat kanë ardhur tani në nivelin e 30 bashkive, mbetet i njëjtë raporti i infeksionit femra-meshkuj, ndërkohë që fatalitetet janë në të kundërtën e këtij raporti. Numri i personave të shtruar në spitale Covid 1 dhe 2 ka pësuar ulje. Edhe numri i të shtruarve në reanimacion dhe përkatësisht atyre të intubuar ka pësuar një ulje”,-tha Fico.

Sipas saj, gjatë kësaj periudhe është vijuar me vaksinimin, i cili deri ditën e djeshme në totalin e dozave të kryera është 433 628 me një mesatare ditore tek 16 mijë.

”Disa qarqe si Gjirokastra, Berati dhe Korça nuk kanë pësuar ndryshime të ndjeshme për të vlerësuar masat e marra paraprakisht. Kujtoj qytetarët se nuk ka përfunduar beteja jonë me Covid-19 prandaj respektimi i rregullave, mbajtja e maskës, distancimi social, higjiena, identifikimi i rasteve të reja, karantinimi i tyre dhe respketimi i këtyre rregullave duhet të vijojë”.