Filip Çakuli:”Doktor, fëmijët s’të dëgjojnë, s’ke ç’u bën!”.Kundërpërgjigjet Berisha:Filip, kujdes!

Nga Filip Çakuli.

I dashur Doktor!

E lexova me vemendje reagimin ndaj emërimit të djalit tim tek Lojërat e Fatit. Janë ca vese që vdesin me shpirtin dhe ti nuk mund ta lije të të ikte ky rast, ndaj të falenderoj shumë.

Unë u përpoqa nën mësimet e tua ta edukoj djalin dhe ta mësoj si të çaj në jetë, por ai nuk më ka dëgjuar kurrë. Kur nuk zinte dot të dashur kur ishte i ri, i kam pas thënë, “provoje një herë me ndonjë kushërirë sa të mësohesh”, se s’u bë qameti, po ai nuk pranonte, se ishte djalë me namuz.

Pastaj kur mbaroi studimet jashtë shtetit dhe u kthye në Shqipëri i thashë të rregullon babi në punë si sekser, se e njoh kryeministrin, por s’më dëgjoi. I thashë mos t’i përkushtohej punës dhe zanatit që kishte mësuar, se siç e dimë unë e ti, s’ka parë njeri hair nga zanati, as unë dhe as ti si i mjekësisë. Të dy politika na ka mbajt gjallë, por s’më dëgjonte. I thashë puno si sekser, kap ndonjë biznesmen që do tendera, toka në bregdet, tek Gjiri i Lazit, në Vlorë, shiko vëri ndonjë gjobë këtyre që kanë marrë konçesione hidrocentralesh dhe rafinerish nafte, p.sh në Cërrik, por ai donte punën e vet.

Pastaj erdhi puna që do martohej me një vajzë që donte, dhe e kundërshtova. I thashë shiko ndonjë që ka studio ligjore se e lidh unë me kryeministrin dhe u marrim përqindje për çdo firmë që hedh kryeministri, por nuk më dëgjoi. Shkoi u martua me atë që i ishte fiksuar.

Kaloi kështu mbi 10 vite punë të përditshme profesionale, dhe ishte aq i njohur në fushën e tij të IT, sa ti e emërove drejtor të IT për 6 vite, edhe pse mua më kishe ngrirë si bashkëpunëtor.

Tani duan t’i ngarkojnë një punë të bezdisshme të formalizojë lojërat e fatit, duke i futur në rrjet për shkak të zanatit që ka. I thashë mos e prano këtë punë. Ka lezet siç kanë qenë kur i kishte në dorë djali jot, ku gjysma ishin pa licencë dhe bëje para sa të doje. Nuk më dëgjoi dhe vazhdoi përsëri.

Tani të besoj se kur rriten fëmija prishet shtëpia. Mua s’më ka dëgjuar asnjëherë sa herë kam dashur t’i them të lërë punën dhe zanatin e tij dhe të bëhet sekser, ashtu si ty s’të ka dëgjuar kurrë, sa herë i thoshje mos u merr me demontim se do vrasësh njerëz, mos u merr me shitje tokash se do na telendisësh, mos u merr me gjoba për koncesione rafinerish se do detyrohesh t’u kthesh lekët, e sa, e sa raste të tjera. Por fëmijët s’të dëgjojnë, s’ke çu bën.

Ç’të të them tjetër i dashur Doktor. Atë që të bën fëmija s’ta bën Perëndia. Nuk di a të kujtohet kur para tre vjetësh hape me gërma të mëdha RD, se djali im kishte shtypur tre dele me makinë, nga të cilat, dy shpëtuan dhe një humbi jetën. Të kujtohet me siguri. Djali e kujton dhe sot dridhet nga makthi. Unë i them, “të keqen babi mos u mërzit”, wshtë aksident teknolgjik, gjëra që ndodhin. Djali i Doktorit vrau 26 vetë dhe plagosi 200 të tjerë e si thotë njeri gjë, vetëm i qajnë hallin”. Po ai akoma dridhet nga frika dhe i del ajo delja në gjumë. Djali jot e bën gjumin top, dhe s’ka faj, se s’ka shtyp asnjë dele!

Që ta mbyllim këtë muhabetin e djemve, duhet thënë se kemi dhe ne pak faj. Mua në kohë të lirë gjithë jetën djali më ka parë duke luajtur shah, duke lexuar ndonjë libër, ose duke ikur në ndonjë hotel me kazino, dhe ja ku përfundoi; inxhinier IT për lojra fati. Yt bir të ka parë gjithmonë duke folur kë të vrasësh, kë të zhdukësh, kë të qërosh dhe përfundoi zbërthyes fishekësh e bombash.

Kemi dhe ne fajet tona.

Kundërpërgjigjet Sali Berisha:

Qytetari dixhital më informon: Edi Rama emëroi Zhani Cakullin në kundershtim me ligjin sepse i duhen Olsit licencat e kazinove dhe lojerave të fatit! Për me shumë lexoni mesazhet e qytetarëve për këtë çështje. 

"Përshendetje zoti Berisha ! I nxitur nga denoncimi që i bëtë emërimit të djalit te Filip Çakullit, Zhani Çakulli nga Edi Rama pas dorëheqjes së detyruar të drejtoreshes së e lojërave të fatit,po ju informoj se Edi Rama për këtë qellim ka nxjerr VKM të veçantë të premten me te cilin autorizon veten që "në rast emergjence drejtorat emërohen dhe nga një grup pune i keshillit ministrave".Rama nxori VKM sepse ministri Cani refuzoi të emëroj Zhani Çakullin në atë detyrë sepse djali  i Filipit nuk përmbushte kushtet, nuk ka arsimin e lartë 3+2, është vetem me 3 vite Kristal ( Rama kur tallet e ka për batutë " a ka njeri me Kristal këtu?!", e emëroi Zhanin me 3 vite Kristal. Përveç kësaj Cani nuk pranoj të emëroj Zhanin sepse ai ka punuar në kazino.

Rama bëri çdo gjë për të emëruar djalin e Filipit mbasi tani del ligji i lojrave të fatit dhe Olsi do kontrolloj dhe shesë licensat e e reja.

me shume respekt

G.A"

"O Shef po ky djali Filipit si u emerua pa konkurs DAP-i… pastaj drejtorin e NjMLF e emeronte dikur ministri financave dhe kurrë kryeminustri, ndërsa tani ska me emerim por me konkurs nga DAP për drejtues TND (niveli lartë drejtues). Ndërkohë ka plot të tjerë që e kanë bërë konkursin dhe janë në pritje të hapjeve të vendeve të lira. Nuk ka mundesi që të hapet vendi dhe Rama ta emëroi, apo ka filluar e shkelin ligjin me 4 kembe!!! Ai ka diplomë Kristali 3 vjeçare dhe nuk përmbush kriteret për drejtor. Pa llogaritur që është dhe konflikt interesi se ka punuar në kazino me Gjergj Lucen. Ku eshte premtimi i kesaj qeverie qe do punësohen me konkurse??"