Fjalimi në forumin e Bled-it, Berisha: Hokatar i pacipë, për shqiptarët është turp që përfaqësohen nga Rama

Sali Berisha ka dhënë qëndrimin e tij për fjalimin që kryeministri Edi Rama mbajti gjatë forumit ”Bled” në Slloveni. Berisha tha se Rama ka bërë një deklaratë “të pacipë dhe të turpshme”. Ish-kryeministri iu referua deklaratës së Ramës ku thuhej se “nëse merret për bazë lufta për anëtarësimin e Ukrainës në BE, vendet e Ballkanit janë gati të sulmojnë njëri-tjetrin”.

Postimi i plotë:

Një hokatar i pacipë dhe i pakripë! Të dashur miq, Në pozitën e një hokatari të pacipë dhe të pakripë Edi Rama, për të shprehur pakënaqësinë e tij, për qëndrimin e ftohtë të BE-së ndaj Shqipërisë deklaroi në Slloveni, në Forumin e Bledit se: Nëse merret për bazë lufta për anëtarësimin e Ukrainës në BE, vendet e Ballkanit janë gati të sulmojnë njëri-tjetrin.
Kjo është një deklaratë e pacipë, e turpshme.

Ukrainasit kanë firmosur statusin e kandidatit të vendit të tyre në BE me gjakun, heroizmin, sakrificat e luftën dhe rezistencën e jashtëzakonshme, martirizimin e qindëra mijëra bijve dhe bijave të tyre, për lirinë dhe sovranitetin e vendit të tyre nga agresori barbar rus, por edhe mbrojtjen i lirisë dhe sovranitetit e mbarë kombeve të lira të Europës.

Kurse Edi Rama ka vendosur në Shqipëri regjimin e narkoshtetin e parë dhe të vetëm në Europë, të bazuar në krimin e organizuar, drogën, korrupsionin e qeveritarëve shqiptarë me të cilin ka detyruar shqiptarët të largohen nga Shqipëria më shumë sesa janë larguar ukrainasit nga bombardimet ruse të fshatrave dhe qyteteve të vendi të tyre. Për shqiptarët është turp që përfaqësohen nga Edi Rama!