Frikë dhe kujdesje. Autoritetet dezinfektojnë banesat e të infektuarve

Shqipëria nga ora në orë ndryshon, pasi numri i të prekurëve rritet. Të prekurit me Covid-19, janë nga Korça, Durrësi, Vlora, Elbasani, Fieri, Tirana, Kavaja, Laçi, Kavaja, Shkodra ndërsa në hartën e qyteteve që kanë shënuar persona të infektuar u shtua edhe Kruja.

Lidhur me këtë situatë të vështirë, ku thelbësore është higjena dhe izolimi. Autoritetet lokale dhe jo vetëm, mësohet se kanë nisur dezinfektimin e pallateve dhe ambienteve para banesave të personave që u identifikuan pozitivë me COVID-19. Ky proces, në një farë mënyre, identifikon edhe zonat ku janë konstatuar persona të infektuar, çka rrit shkallën e vigjilencës edhe nga vetë qytetarët.

Nga ana tjetër, hetimi epidemiologjik ka nisur verifikimin e personave që kanë qenë pranë njerëzve të infektuar dhe të atyre që kanë patur kontakt të afërt. Fatmirësisht, deri më tani familjarët e të infektuarve kanë rezultuar negativë, gjithsesi atyre u është kërkuar të respektojnë vetizolimin për dy javë.