Fundjava dhe Kurban Bajrami, mijëra kosovarë drejt Shqipërisë

Festa e Kurban Bajramit ka sjellë fluks në pikën e kalimit kufitar të Morinit në fillim të kësaj fundjave. Mijëra qytetarë të Kosovës, iu drejtuan bregdetit shqiptar për të pushuar dhe për të festuar Kurbanin Bajramin. Në mesin e tyre kishte edhe shumë emigrantë që po ktheheshin në vendet e punës pas pushimeve në vendlindje. Vetëm nga ora 05:00 e së shtunës raportohen të kenë hyrë në vend 2463 mjete me 12486 shtetas, shifra këto që pritet të rriten në orët në vijim. Përballë këtij fluksi policia kufitare e Morinit ka ngritur traun e doganës duke operuar me procedurë të përshpejtuar. Ndërkohë fluks të lartë pati edhe në hyrje për në Kosovë.