Gazetari: Çka tha Rama në Selanik, s’ka ndodhur ndonjëherë në territorin grek

Shtypi grek vijon t’i bëjë jehonë deklaratave që bëri kryeministri Edi Rama, gjatë takimit me shqiptarët në Selanik. Gazetari shqiptar në Athinë, Etmond Guri në një intervistë në televizionin Klan News, tha se edhe pse mediat greke janë të njëanshme në raportimin e tyre, sërish po i bëjnë jehonë Ramës, duke bërë që ky i fundit të marrë pikë.

”Mesa duket z.Rama është kthyer në një lojtar shumë të fortë, di të luajë, di të provokojë, di të sfidojë e tërheqë vëmendjen e mediave në Greqi. Grekët kanë një parim, që edhe dizinformimi shumë herë është reklamimi më i mirë. Në këtë rast, mediat greke po i bëjnë punë të shkëlqyer z.Rama, pavarësisht se janë të njëanshëm dhe e paraqesin lajmin sipas këndvështrimit të tyre, por gjithsesi Rama në të dy rastet ka dalë fitimtar.

E para ishte në Maj që u prit në një aktivitet që ka mbetur në histori për nga të gjitha aspektet. Mos harrojmë faktin që dhe në atë periudhë kemi diskutuar për të paktën 3 javë 24 orë në 24 në të gjitha mediat, në të gjitha format, në Greqi kishin si temë kryesore z.Rama dhe kjo mjaftoi për të mbushur një stadium në Galatsi që mund të mbushej dhe një i dytë dhe një i tretë. Edhe në Selanik pati interes shumë të madh, të shtuar madje, nga një sallë që ishte 1 mijë vendëshe arriti 2000-2500 veta të ftuar, pati tejmbushje”,-tha gazetari Guri.

Rama bëri deklarata të forta politike në Selanik, ku veçohet ajo me termin “vorio-epir”, për të cilën kryeministri theksoi se është një çështje e vdekur. E në këtë aspekt, gazetari Etmond Guri u shpreh se deklarata të tilla në territorin grek nuk janë bërë ndonjëherë nga një kryeministër shqiptar të paktën pas viteve ’90.